के लेख्छौ कविजी ?

साँझको बेला अध्याँरो कोठा, झ्यालको छेउ कविजी 

भोको पेटले, सुकेको ओठले के लेख्छौ कवि जी ?

सुकेको गाला, बसेको कन्चट, धमिलो आखाँ कविजी 

थोत्रो कलमले थोत्रो कापीमा के लेख्छौ कविजी ?

 

इन्द्रधनुष तल वसन्ती वागमा भ्रमरका गान सुन आऊ 

फुलेको फूलको परिवारमाथि पुतलीको खेल हेर आऊ 

सरसर शीतल वहेको हावा, फूलको बैंस सुँघ आऊ 

तिमी के देख्छौ, म के लेख्छु मेरो कविता सुन आऊ ।

 

जे देखी जे अनुभूत हुन्छ, त्यो देख्न, लेख्न कवि व्यस्त हुन्छ 

हुँदैन बन्धन कवि इन्द्रियको, जहाँ जे देख्न ऊ स्वतन्त्र हुन्छ 

ब्रम्हा निदाए यो सृष्टि रचेर, सिङ्गार्ने जिम्मा कविमा रहन्छ

हेर तिमी नै जहाँ जे खराब, म हेर्छु राम्रो, सके आऊ सपार ।