अझै बाँकी छन् 

प्रजातन्त्रमा हेर्नोस् प्रजा र तन्त्र बाँकी छन् 

लुटेराले अझै लुट्न त्यस्ता धेर मन्त्र बाँकी छन् 

 

गणतन्त्र, लोकतन्त्र यस्ता धेर तन्त्र बाँकी छन् 

हत्याराले सधैँ जप्ने यस्ता धेर मन्त्र बाँकी छन्  

 

सङ्कटकाल सकिए पनि सङ्कट र काल बाँकी छन् 

समाचारले समाउन लाखौँ हज्जार बाँकी छन् 

 

भ्रष्टाचार जति मास, चारका चार बाँकी छन् 

प्रहरेदारहरूमध्ये गद्धार यार बाँकी छन् 

 

सिंहदरबारमा हेर्नोस् दर र बार बाँकी छन् 

बोक्नुपर्ने अझै हामीले देशका भार बाँकी छन् 

 

अधिकार खुबै खोज्ने त्यस्ता धिक्कार बाँकी छन् 

सुन्नु पर्ने धेरैका ती अझै चित्कार बाँकी छन् 

 

कानुनहरूमा जति खोज कानु र नून बाँकी छन् 

न्यायको भकारीमा अन्याय डङ्गुर बाँकी छन्