मुलुकमै पहिलोपटक जनस्तरबाट झापामा कोरोना परीक्षण पीसीआर ल्याब स्थापनाको तयारी

झापा । कनकाई नगरपालिका स्थित सुरुङ्गामा जनस्तरबाट मुलुकमै पहिलोपटक झापामा स्थापना हुन लागेको कोरोना भाइरस परीक्षण गर्ने पीसीआर ल्याब छिटै सञ्चालन गर्ने तयारी भइरहेको छ ।

एकका लागि एक अभियानको अगुवाईमा सरकार–समुदाय–सहकारीबीच साझेदारीको नमूनाका रुपमा ल्याब सञ्चालनका ९० लाखभन्दा बढी रकम उठी सकेको तर अझै थप करिव ३० लाख रुपिया आवश्यक पर्ने अभियानले जनाएको छ । आवश्यक रकम जुटाइ सकेपछि प्रदेश सरकारलाई हस्तान्तरण गरिने तयारी रहेको पनि एकका लागि एक अभियानले बताएको छ ।

एकका लागि एक अभियानका साझेदार संस्थाहरुबीचको हालै झापामा सम्पन्न बैठकले आगामी १५ दिन भित्रै ल्याब सञ्चालन हुने गरी प्रदेश सरकारलाई रकम हस्तान्तरण गर्ने निर्णय गरेको छ ।

प्रदेश सरकार सामाजिक विकास मन्त्री जीवन घिमिरे समेत सम्लग्न बैठकको निर्णय अनुसार कनकाई नगरिपालिका सुरुङ्गा स्थित कोटीहोममा रहेको समर्पण भवनमा सरकारी मापदण्ड अनुसारको ल्याब स्थापना गर्ने तयारी रहेको छ । मेची अञ्चल अस्पताल अन्तरगत रहने गरी ल्याबका लागि अनुमति, व्यवस्थापन र सञ्चालनको जिम्मेवारी प्रदेश सरकारले लिने सहमति भएको पनि अभियानले जनाएको छ ।

सरकारी मापदण्ड अनुसार ल्याब स्थापनाका लागि अन्नपूर्ण न्यूरो हस्पिटल अन्नपूर्ण रिसर्च सेन्टर, काठमाडौंबाट आएका डा. दिनेश थापा तथा अनुसन्धान अधिकृत अनिलकुमार साह र विराज लोहनीको टिमले शुक्रवारबाटै काम शुरु गरेको छ । केही दिन पहिलेदेखि सहारा नेपालको अगुवाई तथा अढाई दर्जन संघ–संस्थाको साझेदारीमा एकका लागि एक अभियान शुरु भएको हो । अभियानको मुख्य साझेदारमध्येको जिल्ला सहकारी संघ झापाका अध्यक्ष गणेश ढकाल र सहसचिव भवानी दंगालले सहकारी अभियानकातर्फबाट एक साताभित्र २५ लाख रुपैयाँ अभियानलाई प्रदान गर्ने बताउनु भयो ।

यसैगरी रुद्र–गौरी श्री–अम्बिका ओली प्रतिष्ठानले दुई लाख पाँच हजार एक सय एघार र पुनरनिर्माण नेपाल दुई लाख प्रदान गरेको कुरा रुद्र–गौरी श्री–अम्बिका ओली प्रतिष्ठानका सचिव यज्ञराज (गोपाल) ओलीले बताउनु भयो ।