परिसंवाद
सार्थक चेतनाका लागि परिसंवाद

नव वर्षको शुभकामना भनौं कि !

कोरोना डायरी– १३

थुप्रै दिन भएछ डायरी लेख्न थालेको । कोरोना भाइरसका कारण लकडाउनको साङ्लोमा बाँधिए पछि डायरी सुरु भएको रहेछ । आज २०७७ सालको पहिलो दिन । अर्थात् नववर्षको पहिलो दिन । यही दिन डायरी बन्द गर्छु भन्ने थियो । तर, यो मनले तपाईंलाई सम्झियो । यतिका दिन डायरीका माध्यमबाट सँगसंगै भयौं भने तपाईलाई नववर्षको शुभकामना पनि नदिई कसरी छुट्टिने । त्यसैकारणले मित्र मनमा पीडा बोकेरै भए पनि तपाईलाई मेरो र यो परिसंवाद संचार गृहको तर्फबाट नववर्ष २०७७ को हार्दिक मंगलमय शुभकामना ।

कोरोना भाइरसका कारण विश्व नै त्रसित र त्राहिमाम भएको बेला आएको नयाँ वर्षले सुरुमै कोरोना भाइरसको कहरबाट विश्व मानव समुदायलाई मुक्त गरोस् भन्ने कामना गरौं । मनमा भारी अविश्वास, हलचल, इष्र्या, डाहा, कुण्ठा र शरीर भरी कष्ट बोकेर पनि मान्छे – भोलि यी सबै खाले समस्या समाधान हुने मिठो लोभले बाँचेको हुन्छ । अर्थात् जिजीबिषा (बाँच्ने इच्छा, बाँचिरहने चाहना) ले मान्छेलाई लतार्दै र समयसँगै घिसार्दै साथै भोलितिर फर्किन लोभको कोर्राले हान्दै हिडाउँदै हुन्छ । त्यसै कारणले मित्र तपाईलाई नववर्षको शुभकामना भनेको हुँ ।

मानव सभ्यताको पद्धतिलाई क्रम भंग गर्ने हिम्मत मान्छेमा हुदैन । यदि कुनै दिन मान्छेले त्यो मानव सभ्यताको विकास पद्धतिलाई नष्ट गर्न खोज्यो भने मानव समुदाय पनि लोप हुन्छ । समयको गतिसंगै धेरै कुराहरु हुन्छन् । तर, मान्छे आफ्नो समाप्ती चाहदैन । किन कि जीवन पद्धतिलाई निरन्तरता दिने नै उही हो ।
लौ म त तपाईलाई नव वर्षको शुभकामना दिनका लागि डायरी लेख्न बसेको, कहाँको अर्कै गनथन पो गर्न थाले छु । आउनु होस्, विराटनगर टंक खतिवडालाई फोन गरेर जोगवनी नाकामा मानिसको आवत जावत छ कि छैन सोधौं ।

‘हल्लो टंक जी बोल्नु भ’को !’

‘हो बोल्दै छु ।’
‘के छ जोगवनी तिरको खवर ?’

आवत जावत बन्द छ । विराटनगर महानगरपालिकाका जनताले लकडाउनको पूर्ण पालना गरेका छन् । तर, आधिकारिक होइन र अपुष्ट समाचारका अनुसार राति राति केही व्यक्ति आएको भन्ने हल्ला छ । यसका साथै केही दिन अघिदेखि सरकारले सुरक्षा दह्रो र विश्वासिलो बनाएको छ ।

‘टंक जी ! कोरोना भाइरसबाट जोगिनु पर्छ भन्ने जनता के कारणले त्रसित छन् ?’

अन्य आकर्षणहरू

देउवा दाइसंग अनुनय विनय !

बोलाउँछु फोन गरेर

आन्दोलनको अपिल

माघी

यहाँका जनता दिल्ली, भारतको एउटा धार्मिक सभामा जो ब्यक्ति भागलिएर फर्किएका थिए अथवा भारतबाट यहाँको सभामा भाग लिन आएका थिए उनीहरुबाट त्रसित छन् । वीरगञ्जमा तीनजना संक्रमित भेटिएपछि खुला सिमानाको कारण स्वभाविक रुपले सम्पूर्ण तराई त्रसित छ ।

वास्तवमा टंक खतिवडाको भनाईले नै तराईको अवस्था उजागर गर्छ । वीरगञ्जमा भेटिएका तीन जना मुस्लिम धर्म गुरु हुन र उहाँहरु भारतीय नागरिक भएको बताइएको छ । संसर्गबाट सर्ने यो भाइरसले धर्म, सम्प्रदाय, धनी, गरिब, ठूलो–सानो कोही छुट्याउदैन । त्यसकारण जोगिनका लागि सरकारले गरेको निर्देशनको पालना गर्न बाहेक अरु उपाय छैन ।

काठमाडौं शान्त र सुनसान छ । जब आफैं माथि बज्र प्रहार हुदैन तबसम्म काठमाडौं व्यूँझिदैन । काठमाडौंले उपत्यका बाहिर पनि नेपाल छ भन्ने कुरा केही वर्षदेखिमात्र बुझ्दै छ । सुदुर पश्चिम अथवा तराईलाई समाउने भाइरसले काठमाडौंलाई पनि समाउन सक्छ भन्ने चेत काठमाडौंलाई भर्खर खुल्दै छ ।

मित्रहरु अझै एक दुई हप्ता हामी क्वारेन्टिनमा बस्नै पर्छ । त्यसपछि भने विश्वले नै सोचेर निर्णय गर्ने छ कति दिन बस्ने अथवा कसरी बाँच्ने भनेर । हामी जे कुरामा पनि भारतमै निर्भर रहेछौं । रोग, व्याधी, औषधी, उपचार, खाद्यान्न, तरकारी, भुटुन, मरमसला, फलफुल, पेट्रोलियम पदार्थ र अन्य सामानका लागि भारत बाहेक अन्य विकल्प छैन । खुला सिमानाका कारण अहिले हामी डराई रहेका छौं । कतिपय स्थानमा आवत जावत रोकेर रोकिने अवस्थामै नहुन सक्छ । जबसम्म आवत जावत पूर्ण रुपमा रोकिदैन तबसम्म हामी सुरक्षित भएको ठान्न सक्दैनौ ।

आज नयाँ वर्षको पहिलो दिन । बसेर वर्ष दिनको योजना बनाउन पनि पाइएन । कहिले कोरोनाको त्रासदी समाप्त हुन्छ अनि योजना बनाउला । हुन त राष्ट्रको योजनाले त कुनै लछरपाटो लगाएन हाम्रो योजनाले के नै गथ्र्यो र । तथापि मान्छेका आ–आफ्नै सोच र योजना हुन्छन् । योजना अनुसार काम हुनु नहुनु अर्कै कुरा हो ।

सायद भोलिदेखि कोरोना डायरी नलेखिन सक्छ । तपार्इंलाई सम्भावनाको कुरा मात्र खुसुक्क भनेको । हाम्रो सम्पर्क त कुनै न कुनै माध्यमद्वारा भइनै हाल्छ । यो गनथन भने अब रोकौं कि भनेको । तपाईलाई पनि यो गनथन, विलौना, त्रासदी र कुण्ठित भावना सुन्दा सुन्दा दिक्क लाग्यो होला । लौ त आजलाई यो डायरीको यही विट मार्छु । नमस्कार !

Facebook Comments