राष्ट्रपतिले ‘मेरो सरकार’ नै भन्ने हो

समाजमा सभ्यताको अपेक्षा गर्नेले पहिला आफू सभ्य हुनुपर्छ। सन्दर्भ राष्ट्रपतिले “मेरो सरकार“ भनेको कुरामा के गल्ती भो “राष्ट्रपतिले मेरो सरकार भन्दा“ ? राष्ट्रपतिलाई राज्यको प्रमुख मानिन्छ, संबिधानले पनि त्यही मानेको छ । तर बिगत केही बर्षमा मौलाएको अराजकताले नेपालीहरूलाई फोहोरी बनाएको प्रतीत हुन्छ । देशको सर्बोच्च पदप्रति मर्यादा गर्न नसक्ने हामीले, स्वतन्त्र राष्ट्र भनी कुर्लिनुको आधार के हो ?

१. राजा संबैधानिक थिए, तर उनी पनि “मेरो सरकार भन्ने गर्थे।“ किन आपत्ति भएन ? राष्ट्रपति देशको प्रमुख हो, उनले “मेरो सरकार“ भन्दा के गल्ती भयो ? ठूलाठूला पत्रिका चलाउने मित्रहरू बताइदिनुहोस्, राष्ट्रपतिले मेरो सरकार भन्न कुन कानून र संबिधानको कुन धाराले रोकेको छ ?

२. राष्ट्रपति राज्य प्रमुख भएको हुनाले, राज्यको सरकारलाई राष्ट्रपतिले मेरो सरकार भन्दा, विद्यादेवी भण्डारीको सरकार भनेको होइन, राज्यको सरकार भनेको हो भनेर बुझ्न पनि कसैले पढाउनु पर्ने ? संसदमा राष्ट्रपतिको सम्बोधनमा राज्य बोलेको हो भण्डारी बोलेको होइन । “राज्यले“ मेरो सरकार भनेको हो । राष्ट्रपतिलाई त फौजदारी दायित्वबाट पनि मुक्ति दिएको हुन्छ ।

३. प्रधानमन्त्री लगायत राज्यका सबै पदहरू राष्ट्रपति समक्ष सपथ लिएपछि क्रियाशील हुन्छन् । सङ्कटकालमा राष्ट्रपतिले नै देशको जिम्मा लिनुपर्छ। राष्ट्रपति कमान्डर इन चिफ पनि हुन् । त्यसैले उनलाई राज्यको संरक्षक मानिन्छ । उनले नीति तथा कार्यक्रम प्रस्तुत गरेको सरकारलाई मार्गनिर्देशन दिएको हो । त्यसैले “मेरो सरकार“ भनेको “नेपालको संबिधान अन्तर्गतको सरकार भनेको हो । अल्पज्ञान खतरनाक हुन्छ ।

४. हामीले यो बुझ्नुपर्छ, हामी लोकतान्त्रिक ब्यवस्था अन्तर्गत छौँ । जुन ढाँचाको सरकार हामीसँग छ, त्यसलाई संबैधानिक राज्य प्रमुखको ढाँचा भनिन्छ । यस्तो ढाँचामा राज्यको सरकार राज्य प्रमुखकै हुन्छ । तर त्यो अधिकार पार्लियामेन्टले बनाएको प्रधानमन्त्रीले प्रयोग गर्छ ।

५. देशलाई कमजोर पार्ने तत्त्वले राज्यका सबै निकायलाई पत्रु जस्तो बनाइदिएको छ । देशको सम्मान भनेको देशका संयन्त्रहरूको पनि सम्मान हो । सगरमाथाको गीत गाएर मात्र देशभक्ति र माया हुँदैन । सभ्य नागरिकले राष्ट्रका निकायप्रति सम्मान गर्न र लोकतान्त्रिक ब्यवस्थाको कदर गर्न पनि जान्नुपर्छ ।

६. आकाशमा हवाइजहाज होल्ड गरेको कुरा समेत उठ्यो । अमेरिकामा राष्ट्रपति आउँदा के हुन्छ ? खोज्नुहोस् ।

७. राष्ट्रपतिले भन्ने “मेरो सरकार“ नै हो । बकम्फुस तर्क नदिऔँ । राष्ट्रपति राज्यप्रमुख हो, त्यो पदले सम्पूर्ण राष्ट्रको प्रतिनिधित्व गरेको हुन्छ । त्यसैले सरकारलाई मेरो भनिएको हो । चाकरी गरेको नभन्नुहोला । म राष्ट्रपतिको लिस्टमा परेको र निम्ता पाउने मानिस होइन । मैले राज्यको प्रतिरक्षा गरेको हो ।