धर्तीको स्वर्ग कहालीलाग्दो सुनसान छ…!

मेरो देश
धर्तीको स्वर्ग
कान्तिपुरी नगरी
आज
कहालीलाग्दो
सुनसान छ…।

जात्रै–जात्राले उत्सवमय,
टोल–टोल, डबली, चोक
निर्जन छ…।
निष्प्राण छ…।

हाँसो र खुसीले उल्लासमय,
प्रीतिपूर्ण जन–जीवन
मरुभूमिसरि
उजाड छ…!

कोरोना…!
तिमी यतिसम्म पनि
निष्ठुरी र निर्दयी नबन
हाम्रा आस्थाका देवताहरू समेत
मूकदर्शक अनि
किंकर्तव्यबिमूढ भइ
यी भब्य मन्दिरहरू छाडेर
अन्तै बसाइँ सर्न नपरोस्..!

अब त अति भो
तिम्रो क्रूर-यातनाले
मेरो यो
दिव्यमय कान्तिपुरी नगरी
घर–घर शोकमा डुबाई
लाश थुप्रिएको
स्मशान नबनाई देऊ …!