म एक्लो 

सबैको भएँ म, मेरा कोही भएनन् 

जो जो थिए मेरा अब ती रहेनन् 

गुरु भन्नु हुन्थ्यो यहाँ सब छन् एक्लै 

भएछ र भ्रान्ति खोजें आफ्ना बेग्लै 

भयो पाएको झैँ तर होइन रहेछन्

आए जे लिन ती लिएर गएछन् 

म मात्रै छु मेरो, मेरो छु म मात्रै

ती मेरा भनेका थिए भ्रान्ति मात्रै 

आयो सत्य सामु अब भ्रान्ति छैन 

यहाँ मेरो भन्नु कतै कोही  छैन  

सबै एक्ला एक्लै कोही छैन बेग्लै 

म हाँस्छु, म रुन्छु, म मेरो छु एक्लै 

यही सत्य पूर्ण छ अरु सत्य छैनन् 

सबैको भएँ म, मेरा कोही भएनन् 

गुनासो यो होइन न ता पश्चाताप हो 

सबैको मेरै हाल शायद श्राप नै हो 

बुझेँ सत्य बल्ल अब भ्रम रहेनन् 

धेरैको भएँ म, मेरो कोही भएनन्  ।