फाइल थरिथरिका

हाकिमका हातमा हुन्छन् दुईथरीका फाइल

गाईफाइल एकथरी, अर्का साँढेफाइल

साँढेफाइल पनि दुई थरि — हान्ने नहान्ने हुन्छन्

हान्ने साँढेफाइल आए नहान्ने चैँ लुक्छन्

हान्नेमा पनि दुईथरी — डाम्या, नडाम्या हुन्छन्

डाम्या हान्ने साढेदेखि बाँकी फाइल लुक्छन्

गाईफाइल थरिथरिका — बाच्छी, कोरली ब्याउने,

दुधालु, थारो गाईफाइल, कुन पाल्ने, कुन फाल्ने ?

बाच्छी गाईफाइल आए धाप मारेर छाड्छन्

कोरली या ब्याउने आए आफ्नै गोठमा राख्छन्

दुधालु गाईफाइल आए कल्चौडामा आखाँ 

ठूलो कल्चौडोलाई तुरुन्तै, सानोलाई भाका !

लात्ती हान्ने, नहान्ने के छ, राम्रोसँग बुझ्छन्

दूध पगार्न नौनी दल्दै ठूलै बाल्टी थाप्छन्

थारो, बैला, बुढी फाइल देखे आँखा तर्छन्

लाखौँ त्यस्ता गाईफाइल बर्षैपिच्छे मर्छन् ।