कविता गहिरो हुनुपर्छ

‘कविता गहिरो हुनुपर्छ’ 

त्यो सुनेदेखि कविजी खाल्डो खनेको खन्यै हुनुहन्छ

आफ्नो कवितालाई गहिरो खाल्डोमा राखेर

कविजी आफ्नो कवितालाई गहिरो बनाउने सुरमा हुनुहुन्छ ।

‘कविता राम्रो हुनुपर्छ’

त्यो सुनेदेखि कविता लिएर ब्युटी पार्लर धाउँदै हुनुहुन्छ

कविता लेखेको पानामा गाजल लिपिस्टिक दलाउँदै हुनुहुन्छ

कविजी आफ्नो कवितालाई राम्रो बनाउँदै हुनुहुन्छ ।

‘कविता गम्भीर हुनुपर्छ’

त्यसैले त कविजी आफ्नो कविता खल्तीमा हालेर

जोसुकैको मलामीमा पुग्नुहुन्छ

प्रायः कवितासँगै उहाँ मसानघाटमै भेटिनुहुन्छ  !