तिम्रो र मेरो थर एउटै हुने थियो

त्यो दिन
जब म कुनै अज्ञात सतीदेवीको खोजीमा
कुनै दक्ष प्रजापतिको घर खोज्दै थिएँ
त्यो दिन संयोगले तिम्रो माइत पुग्दो हुँ
र
कुनै विष्णुले प्रपञ्च रचीदिँदा हुन् त
आज तिम्रो र मेरो थर एउटै हुने थियो
तिम्रो र मेरो घर एउटै हुने थियो।

त्यो दिन
कन्यार्थका लागि
दौडाहामा छुटेका मेरा लमीहरू
तिम्रो माइती गाउॅ पुगेका भए
तिम्रो बैंसको वासना
अरूले थाहा नपाउँदै
मैले चाल पाएको भए
आज
तिम्रो र मेरो थर एउटै हुने थियो
तिम्रो र मेरो घर एउटै हुने थियो।

त्यो दिन
मेरा ज्योतिषिले मलाई
तिम्रो गाउॅको बाटो देखाइदिएका भए
छैठौंको दिनमा मेरा विधाताले
मेरो निधारमा तिम्रो नाम लेखाइदिएका भए
आज
तिम्रो र मेरो थर एउटै हुने थियो
तिम्रो र मेरो घर एउटै हुने थियो ।

तिम्रो र मेरो दौत्य सम्बन्ध
उसै बखत् प्रगाढ भैदिएको भए
तिमी र म कसैसित नबाधिई
कन्य–कुमार रहिरहेका भए
आज
तिम्रो र मेरो थर एउटै हुने थियो
तिम्रो र मेरो घर एउटै हुने थियो।

हाम्रो जीवन अरू कसैको भाग्यमा
कोरिँदै नकोरिएको भए
बरू, कसैसित पनि लगनगाँठो
जोरिँदै नजोरिएको भए
आज, तिमी सुम्निमा भएर
मालीबाँसको काँगियो खसाल्दै हुन्थ्यौ
म पारूहाङ भएर त्यसलाई ओल्टाइपल्टाइ
हेर्दै हुँदो हुँ।
अन्तत: तिम्रो र मेरो थर एउटै हुने थियो
तिम्रो र मेरो घर एउटै हुने थियो।

त्यो दिन
तिमी मेरै निम्ति भनेर जन्मिदिएकी भए
हतारिएर कसैको डोलीमा
हत्तपत्त नअन्मिदिएकी भए
बरू,
हरेक सालको माघ महिनामा
मेरो नाममा स्वस्थानीको ब्रत लिएकी भए
आज,
तिम्रो र मेरो थर एउटै हुने थियो
तिम्रो र मेरो घर एउटै हुने थियो।