नदी

विहानी उषाले खसाएर रस्मी
सुनौली बनेकी जलाधार लक्ष्मी।
यतै छन् सुसेली यतै छन् उजेली
नदीमा रमेको छ जादू तिलष्मी।१

छचल्किन्छ पानी, उचालिन्छ पानी
झरीले चढेको छ उम्दो जवानी।
निला छाल उठ्छन्, दगुर्छन्, विलिन्छन्
मिठो लोभ लाग्दो छ यो जिन्दगानी।२

कलाले कुँदेका किनारा जिवन्त
नदी चेतना हो बगेको अनन्त
विसौंनी कहीं छैन यो वेग मारी
बगेको बगै जान्छ टाढा दिगन्त।३

नदी गाउँछे, तालमा खेल्छ पानी
रिसाए, दु:खे ल्याउFछे यो सुनामी।
स्वयम्ले बनाएर बाटो कुलेसो
भँगाला समेटी कुदेकी हिमानी।४

यहींबाट टुङ्गिन्छ खेला कहानी
यहीं नै लिने हो विदाको सलामी।
यहीं शोक श्रध्दाञ्जली भाव पोखी
यहींबाट फिर्छन् सबैका मलामी।५