भन्ने गर्थे सबै मान्छे स्वर्ग नै हो अमेरिका,
जान पाए त देखिन्थ्यो, गर्दथें नित्य कल्पना ।
नेताको भाग्य पल्टेझैं भाग्यमानी स्वयं बने,
छोरीका निहुँमा हर्क मान्दै म अम्रिका गएँ ।
न्युयोर्कको प्रशंसा नै प्रशंसा सुनियो जब,
हेरी स्वर्गीय आनन्द प्राप्त गर्न गएँ तब ।
घमण्डले फुले जस्तो थियो टायम स्क्वायर,
जाबो कोबिड सामुन्ने झुक्यो आज कठैबरा !
अर्को एम्पायर स्टेट नाम प्रासादका तला,
छयासी र उँभो सोह्र मोहनी लाउने कला ।
भन्थ्यो गर्व गरी अग्लो मजस्तो अरु को छ र !
जाबो कोबिड सामुन्ने झुक्यो आज कठैबरा !
दर्शनीय त्यहाँ अर्को पुल ब्रुक्लिन नामक
रहेछ र त्यहाँ मान्छे हेर्न जान्थे निरन्तर ।
भन्ने गर्थ्यो मबाहेक अरु को छ र सुन्दर !
जाबो कोबिड सामुन्ने झुक्यो आज कठैबरा !
अग्लो स्वतन्त्रताको त्यो ताँबाको प्रतिमा जब
देखें अनि गई हेरें तिर्सना मेटियो तब ।
प्रतिमा झुक्न जान्दैन, भने मनमनै, तर
जाबो कोबिड सामुन्ने झुक्यो आज कठैबरा !
प्रसिद्ध स्थान हो अर्को केन्द्रीय पार्क नामक,
अन्य आकर्षणहरू
वनभोज र व्यायाम, आराम गर्न निर्मित ।
न्युयोर्कको श्रेष्ठ स्थान म नै हुँ भन्दथ्यो, तर,
जाबो कोबिड सामुन्ने झुक्यो आज कठैबरा !
चन्द्र, मङ्गलमा जाने यान निर्मित छन् त्यहीं
उत्कृष्ट अभियन्ता र वैज्ञानिकहरू त्यहीं ।
त्यहीं छन् विश्वका नामी राम्रा कुशल डाक्टर,
जाबो कोबिड सामुन्ने झुक्यो आज कठैबरा !
उसैको द्रव्य जेठो छ, विश्वमा छ उही धनी,
उसैले अन्तका मान्छे तान्छ चुम्बकझैं बनी ।
त्यहीं जुकर छन् धेरै, बिल गेट्स त्यहीं, तर
जाबो कोबिड सामुन्ने झुक्यो आज कठैबरा !
विज्ञानको महाकेन्द्र छ नासा त्यस देशमा,
जलस्थल दुवै सेना लाखौं छन् आफ्नु भेषमा ।
जेठो सेताघरे फूँ फूँ गर्दै बस्छ त्यहींनिर,
जाबो कोबिड सामुन्ने झुक्यो आज कठैवरा !
भिटो पावरले सारा विश्व नै थर्कमान छ,
टाढा टाढा मार हान्ने शक्तिशाली विमान छ ।
म जित्दछु सबैलाई, भन्थ्यो गर्व गरी, तर
जाबो कोबिड सामुन्ने झुक्यो आज कठैबरा !
Facebook Comments
